భారీ ఈదురుగాలుల బీభత్సం.. మొరంపల్లి బంజర్లో నేలకూలిన చెట్లు, విద్యుత్ స్తంభాలు
EB NEWS/భద్రాద్రి కొత్తగూడెం:
జిల్లాలోని బూర్గంపాడు మండలం మొరంపల్లి బంజర్ గ్రామంలో బుధవారం భారీ ఈదురుగాలులు బీభత్సం సృష్టించాయి. ఒక్కసారిగా బలమైన గాలులు వీయడంతో చెట్లు, విద్యుత్ స్తంభాలు నేలకూలాయి. పలుచోట్ల విద్యుత్ తీగలు తెగిపడి ఇళ్లపై పడటంతో గ్రామస్తులు భయాందోళనకు గురయ్యారు.
గాలుల ధాటికి కొన్ని ఇళ్లపై చెట్లు విరిగిపడటంతో నష్టం వాటిల్లినట్లు తెలుస్తోంది. అలాగే ఇళ్లపై ఉన్న రేకులు ఎగిరిపడినట్లు సమాచారం. విద్యుత్ స్తంభాలు, తీగలు దెబ్బతినడంతో గ్రామంలో విద్యుత్ సరఫరాకు అంతరాయం ఏర్పడింది.
తెగిపడిన విద్యుత్ తీగల కారణంగా ప్రమాదం జరిగే అవకాశం ఉండటంతో ప్రజలు అప్రమత్తంగా ఉండాలని స్థానికులు సూచిస్తున్నారు. అధికారులు వెంటనే స్పందించి నేలకూలిన చెట్లను తొలగించి, దెబ్బతిన్న విద్యుత్ స్తంభాలు, తీగలను పునరుద్ధరించాలని గ్రామస్తులు కోరుతున్నారు.
భారీ గాలుల కారణంగా జరిగిన నష్టాన్ని అధికారులు పరిశీలించి, బాధిత కుటుంబాలకు అవసరమైన సహాయం అందించాలని గ్రామస్తులు విజ్ఞప్తి చేస్తున్నారు.
