EB NEWS/ఆంధ్రప్రదేశ్:
ఆంధ్రప్రదేశ్లో మరో చిన్నారి అరుదైన వ్యాధితో ప్రాణాల కోసం పోరాడుతున్నాడు. కర్నూలుకు చెందిన నాలుగేళ్ల అశ్వర్థ ‘డ్యూషెన్ మస్క్యులర్ డిస్ట్రోఫీ’ (DMD) అనే జన్యు సంబంధిత వ్యాధితో బాధపడుతున్నాడు. ఈ వ్యాధి కారణంగా క్రమంగా కండరాలు బలహీనపడుతూ, శరీర కార్యకలాపాలు దెబ్బతింటాయి.
వైద్యుల సూచనల ప్రకారం, అశ్వర్థకు ఆరేళ్లు వచ్చేలోపు ‘ఎలెవిడిస్’ (Elevidys) అనే ప్రత్యేక జీన్ థెరపీ ఇంజెక్షన్ ఇవ్వాల్సి ఉంటుంది. ఈ ఇంజెక్షన్ ఒక్కసారే ఇవ్వబడుతుంది. అయితే దీని ఖరీదు సుమారు రూ.26 కోట్ల వరకు ఉండటంతో, ఆర్థికంగా సాధారణ స్థితిలో ఉన్న తల్లిదండ్రులు ఈ వ్యయాన్ని భరించలేని పరిస్థితిలో ఉన్నారు.
సమయానికి చికిత్స అందకపోతే ఆరోగ్యం క్షీణించి ప్రాణాపాయం సంభవించే ప్రమాదం ఉందని వైద్యులు హెచ్చరిస్తున్నారు. తమ కుమారుడి ప్రాణాలు కాపాడేందుకు దాతలు, ప్రజాప్రతినిధులు, ప్రభుత్వాలు ముందుకు రావాలని తల్లిదండ్రులు విజ్ఞప్తి చేస్తున్నారు.
ఇటీవల ఇలాంటి పరిస్థితినే ఎదుర్కొన్న మరో చిన్నారి పునర్వికకు ప్రజల సహకారంతో భారీగా నిధులు సమకూరిన విషయం తెలిసిందే. అదే విధంగా అశ్వర్థకు కూడా సహాయం అందించాలని కుటుంబ సభ్యులు కోరుతున్నారు
ప్రాణాల కోసం పోరాడుతున్న ఈ చిన్నారికి సమాజం అండగా నిలుస్తుందా అన్నది వేచి చూడాల్సి ఉంది.
إرسال تعليق