‘దసరా స్పెషల్ ఆఫర్’, ‘పండగ బహుమతి గెలుచుకున్నారు’ అంటూ సైబర్ నేరగాళ్ల కొత్త మోసాలు
EB NEWS/తెలంగాణ:
‘దసరా స్పెషల్ ఆఫర్.. రూ.99కే స్మార్ట్‌ఫోన్’, ‘మీరు పండగ బహుమతి గెలుచుకున్నారు’ అంటూ వాట్సాప్‌కు వచ్చే మెసేజ్‌ల విషయంలో అప్రమత్తంగా ఉండాలని సైబర్ భద్రత నిపుణులు సూచిస్తున్నారు. పండగ సీజన్‌ను ఆసరాగా చేసుకుని సైబర్ నేరగాళ్లు నకిలీ ఆఫర్లు, బహుమతుల పేరుతో ప్రజలను మోసం చేసేందుకు ప్రయత్నిస్తున్నట్లు హెచ్చరిస్తున్నారు.
వాట్సాప్‌లో వచ్చే ఇలాంటి సందేశాల్లో నకిలీ లింకులను పంపించి, వాటిపై క్లిక్ చేయించే ప్రయత్నం చేస్తారు. లింక్‌ను ఓపెన్ చేసి వ్యక్తిగత వివరాలు, బ్యాంక్ ఖాతా సమాచారం, OTP వంటి వివరాలను నమోదు చేస్తే ఆర్థిక మోసాలకు గురయ్యే ప్రమాదం ఉంది. కొన్నిసార్లు నకిలీ వెబ్‌సైట్ల ద్వారా డబ్బులు చెల్లించేలా చేసి మోసం చేసే అవకాశం కూడా ఉంటుంది.
అందువల్ల గుర్తుతెలియని నంబర్ల నుంచి వచ్చే ఆఫర్లు, బహుమతుల మెసేజ్‌లను నమ్మకుండా ఉండాలని సూచిస్తున్నారు. అనుమానాస్పద లింకులపై క్లిక్ చేయకపోవడంతో పాటు OTP, PIN, పాస్‌వర్డ్, బ్యాంకింగ్ వివరాలను ఎవరికీ వెల్లడించకూడదని చెబుతున్నారు.
ఒకవేళ సైబర్ మోసానికి గురై డబ్బు నష్టపోతే ఆలస్యం చేయకుండా 1930 సైబర్ క్రైమ్ హెల్ప్‌లైన్‌కు ఫోన్ చేసి ఫిర్యాదు చేయాలని సూచిస్తున్నారు. అలాగే అధికారిక సైబర్ క్రైమ్ పోర్టల్ ద్వారా కూడా ఫిర్యాదు చేయవచ్చు.
